Mantra Gelar-Gelur

Yén cangkem Bapaké magending, apang atin Bapaké bareng magending. Ento mara madan magending. Saja-saja magending. Yén Bapaké ngigel, apang atin Bapaké bareng ngigel. Ento mara madan ngigel. Saja-sajan ngigel. Keto masih yén Bapaké mamantra, apang atin Bapaké masih bareng mamantra. Ento koné mara madan mamantra. Seken-seken mamantra. Yén Bapaké mamantra gelar-gelur cara raksasa mabuk, demen koné atin bhuta kalané. Malaib kupu-kupuné uli bungan-bungan bantené. Empeng koné kuping widyadara-widyadariné.
“Kadéna nira bongol!” Kénten kocap ujar Bathara Shiwa ring rabin ida Bathari Uma. Kapireng olih okan ida Bathara Ganapati.
“Boya kadi punika, Bathara Aji”, matur kocap Bathara Gana ring ajinida. “Minab sangkaning ipun sane bongol, mawinan ipun mamantra keras-keras, mangda kuping ipuné ningeh munyiné padidi!”

Bathari Uma nénten berkomentar. Digelis Bathari ngutus parekan idané tedun ka jagate “meneliti” napi mawinan mangkinan akeh anaké mamantra gelar-gelur. Di jagaté parekan idané ngelekas dadi Bungkling. Kocapan Bungkling langsung ngojog Banjar Baru. Kala punika wénten piodalan di puran banjaré.

Ring bale pawédané wénten masila anak lanang mabusana putih-putih. Awakné siteng. Lengené gedé. Bayuné ageng. Iteh nguyeng klénéng. Mantrané keras nganti ngungkulin munyin gongé. Cicingé mekalukan ngongkong apa kadén. Jlemané sliwar-sliwer kema-mai sing bisa nengil. Ada masih ané ngigel, makidung, makakawin, ma-sms-an. Alit-alité maplaléan ajak timpal-timpalné. Ramé gati piodalane. Prajuruné kenyem-kenyem bangga. Ento koné ciri upacara meriah. Ida Bathara sesuhunan pasti ledang nyaksiang bhaktin damuhné, niscara gelis Ida lakar micayang kalanduhan ékonomi ring kulawarga suang-suang. Kénten teorin prajuruné, ngutip saking dharmawacanan TV-né.
“Om Swastyastu!” Bungkling makaukan. Raris ipun bareng negak di balé pawedane di ajeng Ida sané wawu puput muput. Matakén Bungkling “to the point”, napi mawinan mamantra keras-keras. Sang sané ketakenin masaut alon. Tutur manis kenyung sadu. Liat welas asih kadi sampun maraga putus. Kuping Bungklingé ningehang, limané nyatet. Kenehné dija kadén.
“Om swastyastu!” Buin Bungkling makaukan di balé panitia odalané. Ditu ia metakon tekén Bapak Keliané, tekén Séksi Upacarané, ngantos Pecalang muwah sekaan gong sami takénina. Makejang dingehanga. Makejang cateta.

Gelisang satua, kadi puniki kesimpulan ipuné. Akeh anaké mangkin mamantra keras-keras nénten sangkaning ipun bongol. Nénten taler sangkaning ipun ngadén Bathara utawi Bathari sané bongol. Tetujon ipuné, apang jelas dingeha tekén kramané. Boya sangkaning kramané bongol, santukan akéh kramané nyacad mantra griyang-griyeng sané kadi bhramara (kumbang) ngisep sari. Baosanga suaran mantrané ten jelas di kuping ipuné. Ten kocap ipun nawang, napi mantrané beneh napi pelih. Kramané mangkin akéh dueg ngapalang mantra ulian mesin fotokopi. Yén ada mantra masuara keras, mantep kocap pangrasan ipuné ngaturang sembah. Punika mawinan anak sané mamantra keras-keras, sangkaning ngisinin keneh krama. Mangda ten terus-terusan kacacad olih sang tan kawenang. Kadi ring satua Tantriné, I Empas mamunyi keras-keras pang suud cacada tekén I Basong ané ngongkong uli betén. ibm. dharma palguna