Bapa Joh Bapa Paek

Bapa Joh Bapa Paek

Apa ané tegehan tekén langit? Bapa, kénten kocap pasaut Dharmawangsa. Makejang anaké matutang pasaut punika. Mawinan ngantos mangkin yén wénten patakon kadi punika, setata anaké maosang Bapa ané tegehan tekén langit.

Sira sané kesengguh Bapa punika?
“Tegehan tekén langit” alus ipun “luhuring langit”. Yén ring kekidungan Déwa Yadnya, Betara sané kawuwus tedun saking luhuring langit inggih punika Betara Siwa. Kocap kadi punika katatwan Ida, masthana luhuring langit, ring Shunyaloka, sané ten kapineh yén kapineh-pineh. Betara Siwa taler keparabin Purusa, utawi Mahapurusa. Ida sané kaucap Bapa?

Wénten Siwa sané saking gumi, inggih punika Pedanda Siwa. Kaucap Siwa sekala ri kala Ida mayoga masedana jangkep. Ida mangastawa mangastuti masadana mantra, japa mantra, bija-mantra, kuta-mantra. Siwa di guminé puniki sané kabaosang Bapa?

Dumun yakti Pedanda maosang ragan Idané Bapa ri kala mawarah-warah ring sisyané. Mangkinan sampun dangan sané nyebut Bapa. Ten kauningin napi awinan magentos. Minab puniki minab punika.

Ring sesonténgan, Akasa kocap sané kasengguh Bapa. Ring wewilangan Panca Mahabhuta yakti Akasa punika sané kabaos pinih luhur. Langit punika wantah wates pengliatan. Asapunika dohné mata dadua puniki sida nyingakin, sawates langit.

Sujatiné kocap luhuran saking langit taler Akasa. Sangkanin wénten ucap “langit tupang pitu”. Saduuran punika kocap wénten malih. Mawinan para pangawi sastrané nyurat Akasa punika ten matepi. Ten neked-neked yén duluh aji papineh.

Menawi sané kabaos Bapa punika taler matingkat-tingkat. Ada Bapa di gumi, ada Bapa di langit éndép, ada masih Bapa di langit tegeh. Ngancan menék-menékang ngancan tegeh I Bapa, nganti sing nyidang nyujuh.

Bapa ané paek anggon gegisian. Wiréh yén sing magisian bisa srayang-sruyung pajalané. Cara megat titi cenik, yén sing melah ban magisian bisa labuh ka tukadé.

Bapa ané duur sirah anggon gantungan keneh. Yén keneh sing gantungan di tongos ané beneh, koné mirib cara layangan pegat, kema-mai ampehang angin. Dija kadén lakar ulung maglebug.

Bapa ané sawat sing kepineh buin, anggon sesuhunan. Wiréh yén sing koné masuhunan bisa goloh sirahé, yén ada angin baret mirib ampehang angin.

Yén manut buku papelajahan agamané di sekolahan, koné ada Bapa ané ngranayang i raga lekad uli di basang Mémé. Anaké mangkin maosang nika mawasta Bapa “biologis”. Bapa kadi punika sané kabaos Bapa sané paek.

Wénten taler Bapa sané ngranayang i raga lekad uli di basang sastra utawi Tattwa-Jnana. Anaké mangkinang maosang punika Bapa ring dharma. Bapa kadi punika genahné duur sirah, tongos ngantungan keneh.