Yén guminé nyalanang upacara, ia sing. Yén guminé manyembah mabakti, ia sing. Yén guminé matapa mabrata, ia sing. Kéwala unduk kaweruhan jnana, ia patuh duégné cara Prabhu Dharmawangsa. Awinan panglingsir Pandawané punika sing nyidayang ngalahang anaké totonan. Nyén to?
Prabhu Candra Bhairawa koné aran anaké punika. Ida boya sing magama, sakéwanten Ida magama sing. Yén Dharmawangsa nyalanang kadharman patuh cara pawarah agamané, ten malémpas saking tattwa-susila-upacara, Candra Bhairawa lian. Candra Bhairawa nyalanang agama cara padidi, kéwala ida seken-seken nyalanang. Awinan yén ring satuané Dharmawangsa sida nembus Shiwaloka, Candra Bhairawa masih patuh neked ditu. Ulian apa ia neked ditu? Ulian magama sing.
Kéto koné cara di satuané. Sangkané panglingsiré ngaé satua buka kéto, apa awinan yén sing mula saja ada kapatutan lén di "magama sing"-é. Lén kapatutan Dharmawangsa ri kala nyalanang agama, lén masih kapatutan Candra Bhairawa ri kala nyalanang agama sing. Ané patuh, kakalih anak wikan punika sami-sami pageh ngamargiang. Ten ada ané ten ngamargiang.
Indik kapatutan sané nasarin pamargin Bhairawané, ngiring pungkuran baosang. Mangkin lanturan bebaosané, wénten malih para wikan sane “magama sing”.
Cara anak mara muruk, akéh para jatiné mangkinan mamantra keras-keras, sakadi takut saget ungsap tekén apalané. Makelo-kelo yén suba nalem-nalemang jnanané, nyenik-nyenikan mantrané, sakadi reng tamulilingan (bhramara) ngisep sari. Kocap yén sampun ngliwatin napi sané keucap kasiddhian mantra, ten malih mantra nika “mamunyi”. Kawéntenan sakadi punika kocap mawasta a-mantra. Teges ipun mamantra kéwala sing.
Sakadi a-mantra, kenten kocap taler a-japa, a-mudra. Majapa sakadi majapa kéwala sing. Mamudra sakadi memudra kéwala sing. Yén sampun kadi “wénten ten wénten” japa, mudra, mantra punika, punapi bebantenané?
Kocap banten punika silih sinunggil rupan yantra. Mapaiketan yantra punika sareng japa, mudra, mantra. Yén sampun a-japa, a-mudra, a-mantra, taler sakadi wénten ten wénten bebantenané punika, kawastanin a-yantra.
Para jati-sujati sakadi punika sané kaucap yukti-yukti ngamargiang agama. Nanging pakanténané sakadi anak “magama sing”. Sakéwanten nénten pateh sakadi anak sing magama. Taler nénten pateh sakadi sané kamargiang olih Prabhu Candra Bhairawa.
Prahu Candra Bhairawa mikolihang kasiddhian sangkaning teleb ngamargiang agama sing, sané lian sareng pamargin Dharmawangsa. Para jati-sujati kadi ring ajeng sampun ngliwatin sakancan sané kabaos kasiddhian.
Yén siddhi nika mateges bek. Ageman para jati-sujatiné punika mateges puyung, boya sangkaning ten wénten dagingné, sakéwanten daging punika sampun “kakutang”, “kapekidihang”, utawi “kawaliang”.
Awinan magama sing madué cecirén sakadi: matetujon sing (nirdon, nirartha), makarma sing (karma akarma), masmara sing (tanakung), kena sing (tantular). Samian niki wantah kocap. Méweh pisan maosang indik kadi puniki. “Magama sing” wantah pawayangan. IBM. Dharma Palguna
Prabhu Candra Bhairawa koné aran anaké punika. Ida boya sing magama, sakéwanten Ida magama sing. Yén Dharmawangsa nyalanang kadharman patuh cara pawarah agamané, ten malémpas saking tattwa-susila-upacara, Candra Bhairawa lian. Candra Bhairawa nyalanang agama cara padidi, kéwala ida seken-seken nyalanang. Awinan yén ring satuané Dharmawangsa sida nembus Shiwaloka, Candra Bhairawa masih patuh neked ditu. Ulian apa ia neked ditu? Ulian magama sing.
Kéto koné cara di satuané. Sangkané panglingsiré ngaé satua buka kéto, apa awinan yén sing mula saja ada kapatutan lén di "magama sing"-é. Lén kapatutan Dharmawangsa ri kala nyalanang agama, lén masih kapatutan Candra Bhairawa ri kala nyalanang agama sing. Ané patuh, kakalih anak wikan punika sami-sami pageh ngamargiang. Ten ada ané ten ngamargiang.
Indik kapatutan sané nasarin pamargin Bhairawané, ngiring pungkuran baosang. Mangkin lanturan bebaosané, wénten malih para wikan sane “magama sing”.
Cara anak mara muruk, akéh para jatiné mangkinan mamantra keras-keras, sakadi takut saget ungsap tekén apalané. Makelo-kelo yén suba nalem-nalemang jnanané, nyenik-nyenikan mantrané, sakadi reng tamulilingan (bhramara) ngisep sari. Kocap yén sampun ngliwatin napi sané keucap kasiddhian mantra, ten malih mantra nika “mamunyi”. Kawéntenan sakadi punika kocap mawasta a-mantra. Teges ipun mamantra kéwala sing.
Sakadi a-mantra, kenten kocap taler a-japa, a-mudra. Majapa sakadi majapa kéwala sing. Mamudra sakadi memudra kéwala sing. Yén sampun kadi “wénten ten wénten” japa, mudra, mantra punika, punapi bebantenané?
Kocap banten punika silih sinunggil rupan yantra. Mapaiketan yantra punika sareng japa, mudra, mantra. Yén sampun a-japa, a-mudra, a-mantra, taler sakadi wénten ten wénten bebantenané punika, kawastanin a-yantra.
Para jati-sujati sakadi punika sané kaucap yukti-yukti ngamargiang agama. Nanging pakanténané sakadi anak “magama sing”. Sakéwanten nénten pateh sakadi anak sing magama. Taler nénten pateh sakadi sané kamargiang olih Prabhu Candra Bhairawa.
Prahu Candra Bhairawa mikolihang kasiddhian sangkaning teleb ngamargiang agama sing, sané lian sareng pamargin Dharmawangsa. Para jati-sujati kadi ring ajeng sampun ngliwatin sakancan sané kabaos kasiddhian.
Yén siddhi nika mateges bek. Ageman para jati-sujatiné punika mateges puyung, boya sangkaning ten wénten dagingné, sakéwanten daging punika sampun “kakutang”, “kapekidihang”, utawi “kawaliang”.
Awinan magama sing madué cecirén sakadi: matetujon sing (nirdon, nirartha), makarma sing (karma akarma), masmara sing (tanakung), kena sing (tantular). Samian niki wantah kocap. Méweh pisan maosang indik kadi puniki. “Magama sing” wantah pawayangan. IBM. Dharma Palguna
0 komentar:
Posting Komentar