Dharma Ririh

Dharma koné cara raré mara lekad. Yén sing melahang ngubuh sinah ia lakar gelem lantas mati. Ada dharma mati sakebedik di awak. Ada dharma mati sakebedik di jagat. Yén dharma mati, patuh cara raré mati. Tusing ada ané lakar nglanturang kauripan. Mawinan dharma punika kapiara tur kajaga lemah peteng, cara ngubuh raré mara lekad.

Raré mara lekad koné cara celebutan yéh. Ulian ening toyané nganti lawatan padidi bisa ngenah ditu di dasarné. Ulian tis toyané cocok pesan anggon masugi. Ulian bersih toyané sing buin perlu lablab yén lakar inem. Sing kudiang-kudiang celebutan mula ngulangunin, luung anggon tongos mangening-eningang keneh. Kéto koné masih dharmané. Kéwala yén celebutané sing katengetang, sinah ada dogén anak iseng ngusak-asik embahané. Awinan liu ada celebutan ané yéhné sing dadi inem, sing duga ban anggon masugi, apabuin anggon tirtha.

Celebutan yéh koné cara sastra. Ada masih ané ngorahang sastra ento ané cara celebutan yéh. Mawinan ada anak nunas pabersihan-panglukatan ka celebutané. Ada masih ané ngalih panglukatan ka sastra. Pangenahné celebutan tekén sastra ento patuh, kewala yen telektekang sing sajan-sajan patuh. Nunas pengluktan ke shastra cara anak ngaé sémér. Pongpong malu tanahé dalemang. Di subané dalem mara lakar nepukin yéh. Satondén nepukin paras di dasar sémér, nu kutek yéh séméré macampur tanah. Buin terus pongpong mara lakar nepukin yéh ening. Sémér ento pagaén manusa. Celebutan ento pagaén alam. Nyén ngaé sastra?

Sastra koné cara candi. Yén candi di pura nganggon batu paras, candi sastra nganggon basa, kabaos candibasa (candi bahasa). Napi kabaos candi yén ten sthanan Betara-Betari. Ring candiné Ida kalinggihang ri kala katedunang jagi kasembah. Ri ajeng candi anaké sané mabakti kisi-kisi “mamaca” keneh padidi. Di ajeng sastra anaké mamaca tulisan, kruna, lengkara, wecana, muah salanturnyané. Maca keneh patuh tekén maca sastra, kéwala yén telektekang sing patuh. Yén maca keneh mirib cara anak masesonténgan. Yén maca sastra mirib cara anak majapa. Ané nyonténg maca isin keneh. Ané majapa maca daging aksara.

Dija tongos dharmané? Yén cara raré mara lekad, dharmané saja suci, kéwala ia tusing bisa nulungin ibané padidi. Liu sajan ada satua nuturang manusa maperang nganti mati koné ulian ngilonin dharma. Sing ada anak maperang ngorahang ibané ngilonin adharma. Sing nyanan tongos dharmané di perang nglawan musuhé ento? Sang Kreshna nuturin Arjuna, kocap kaon pisan kawéntenan anak sané ten purun maperang nglawan musuh. Kocap ring ten purun “maperang” punika ten wénten dharma.

Yén orahang di celebutané tongos dharmané, napi dharma dadi tunas aji canang daksina? Sing nyanan di utsaha ngalih celebutan tur nyaga kesucian toyané, utawi di ketélan peluh dugas ngaé semer tongos dharmané? Kéto masih yén orahang di sastrané ada dharma, dong liu sajan ada dharma, réh janian liu anak duég bisa ngaé tur matutang sastrané padidi. Yén dini kéné yén ditu kéto, buka sing ada ané negul.

Ngiring badingan patakoné. Lakar nguda nakonang tongos dharma? Kadén di patakoné utawi di pasautné tongos dharmané? Koné sing ada dharma ririh. IBM. Dharma Palguna